مدينة الاحلام
أهلا وسهلا بك زائرنا الكريم, أنت لم تقم بتسجيل الدخول بعد! يشرفنا أن تقوم بالدخول أو التسجيل إذا رغبت بالمشاركة في المنتدى
مدينة الاحلام
أهلا وسهلا بك زائرنا الكريم, أنت لم تقم بتسجيل الدخول بعد! يشرفنا أن تقوم بالدخول أو التسجيل إذا رغبت بالمشاركة في المنتدى
مدينة الاحلام
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

لسنا الوحيدون ولكننا المتميزون
 
الرئيسيةالبوابةأحدث الصورالتسجيلدخولتسجيل دخول الاعضاء

 

 لكل ام الفطام التدريجي من تجربتي الشخصيه

اذهب الى الأسفل 
كاتب الموضوعرسالة
بنوتة جنى
مدير المنتدى
مدير المنتدى
بنوتة جنى


الابراج : السرطان عدد المساهمات : 123
نقاط : 340
تاريخ التسجيل : 01/12/2010
العمر : 14
الموقع : جنى

بطاقة الشخصية
زز:

جنى: 3

لكل ام الفطام التدريجي من تجربتي الشخصيه   Empty
مُساهمةموضوع: لكل ام الفطام التدريجي من تجربتي الشخصيه    لكل ام الفطام التدريجي من تجربتي الشخصيه   I_icon_minitimeالأربعاء فبراير 09, 2011 9:48 pm

لكل ام الفطام التدريجي من تجربتي الشخصيه
بسم الله الرحمن الرحيم
والصلاه والسلام علي سيدنا محمد

طبعا موضوع الفطام ده اهم موضوع بيشغل بال كل ام فينا وخصوصا لو ام لاول مره لانه اول صدمه نفسيه في حياه الطفل وطبعا ده بيقلق كتي مننا
انا ها اتكلم عن تجربتي الشخصيه في فطام ابني وبالتفصي الممل لاني اتمني كل ام تستفيد وتفيدني لو حد عند تجربه مشابهه
اولا انا زي اي ام بحب ابني بجنووووووووون وتعبت اوي في حمله وولادته وبخاف عليه جدا
طبعا كل ده طبيعي
وللاسف اضطريت افطمه لاني كنت حامل
فلما جيت افطمه قعدت شويه اعرف كل الخبرات اللي في موضوع الفطام واقرا علي النت خبرات وابحاث وتجارب
كل ده ليه؟
عشان افطم ابني بدون مشاكل نفسيه ليه
كل هدفي اني اخرج من تجربه الفطام بدون اي خسائر للولد لاني بحترم مشاعره جدا وكان صعبان عليا عشان كنت حامل وخايفه يتاثر اكتر
طبعا لقيت اساليب كتيره للفطام وكتير منها ما اقنعنيش واغليبها الطرق التقليديه زي
1 - اني احط حاجه لونها وحش علي صدري زي اليود فالولد يخاف يرضع
طبعا انا رفضت كده لاني مش حابه اضحك عليه وكمان مش عيزاه ياخد صدمه ويقرف من الاكل
2- اني احط حاجه طعمها وحش زي الصبار والبن
وطبعا رفضت لان الولد كده ها يكره الاكل وها ويتعقد وها يتوقع ان الاكل طعمه وحش وفين وفين لما يبدا ياكل طبيعي
3- اني اوديه عند ماما وابعد عنه خالص ووقتها ها يتفطم
وطبعا ده اكتر حاجه مرفوضه لان حرام ان الولد يعاني مرتين مره من منعه من الرضاعه ومره من منعي عنه
كده يفتكرني باعاقبه ويبقي الاثر النفسي اسوا
طبعا في طرق كتييييييييييييير وكلها برضه مرفوض لاسباب منطقيه
المهم قعدت مع نفسي وكان معايا جوزي طبعا وفكرت اني افطمه بس بالتدريج
وعملت لكده خطه كويسه وبدات ارتب نفسي ليها
اول واهم حاجه في الفطامالقرار
والقرار ده لازم يكون نهائي وبلا رجعه مهما حصل

بعد ما اخدنا القرار وحددنا معاد والمعاد ده لام يكون مناسب لظروف البيت يعني منكونش مرتبطين بسفر او فرح او حاجه مهمه عشان الموضوع محتاج تفرغ شويه
نيجي بقي قبل المعاد اللي محددينه للفطام باسبوعين تقريبا ونبدا في اول محطه في خطتنا
المرحله الاولي وهي

(التقليل من الرضاعه)
ودي ها تبقي ازاااااااي
تعالوا نشوف
طبعا كل طفل بيكون متعلق بارضاعه الطبيعي بشكل جنوني وخصوصا لو كان زي ابني معودتوش ياخد بيبرونه ولا سكاته كل اعتماده علي الرضاعه بس
يبقي مينفعش نفطم مره واحده خالص
نقلل ازاي
اكيد كل ولادنا بيموتوا في الخروج وبيحبوا اوي اللف بره البيت وبيتلهوا بره عن الاكل والشرب وبيبقي كل تركيزهم في الشارع والعربيات والناس والانوار
كده عرفنا نقطه ضعف ليهم
يبقي نخرج بيهم كتير اوي ونعزم طول ما احنا بره بعصاير وزبادي وحاجات خفيفه
كده ها يبقي وقت طويل مبيرضعش لانه مبسوط انه بره البيت
وشويه شويه يخرج مع الاب مثلا من غيرك
ها تقوليلي صعب يبعد عني او يخرج من غيري ها اقولك عشان لو مع باباه وجاع ها ياخد عصير او بسكويت غصب عنه لانك مش قدامه عشان ترضعيه
نيجي لبليل اول ما يصحي يزن الحقيه بعصير في بقه عدل او ميه او لبن زي ما بيحب اكتر ومتديلوش فرصه يستني رضاعه
مره كده ومره رضاعه

وخليكي قويه شويه
ولو زن اوي اخرجي اقعدي بيه والهيه عن الرضاعه لحد ما ينام
برضه كل ده قبل الفطام باسبوعين
احنا بنعوده يقلل علي قد ما بنقدر
اتهربي منه كتير
والهيه دايما باسلوب ذكي لاعبيه وشاغليه وهاتي العاب جديده قدامه تشغله شويه
بس طبعا ها ييجي وقت ويقفل خالص وهنا هاترضعيه بس الهدف انه يكون حس ان الموضوع بقي صعب مش سهل زي الاول
كده خلصنا من المرحله الاولي وهيانا الطفل للفطام وبقي بيرضع اربع خمس مرات في اليوم ويمكن ااقل
كل ام وشطارتها
نيجي بقي للمرحله التانيه وهي الاهم والاصعب

(مرحله الفطام )
ودي بتاخد من 3 ايام لاسبوع وهنا بقي الصعب كله
طبعا من قبلها بيومين تلاته مثلا قررتي ان يوم معين هو يوم الفطام يبقي تستعدي من قبلها
تملي البيت بكل اللي يحبه من عصاير وبسكحويتات وفاكهه ومسموح طبعا بشويه عك زي الشيكولاته والشيبسي بس مش كتير مش عايزين تلبك معوي
وتاخدي القرار النهائي تقولي بكره انا ها افطم ابني
والقرار ده مش ها ااكد لازم يكون حازم ونهائي وتكوني مصممه علي موقفك مهما حصل ومتضعفيش مهما شفتي لان اول يوم ده بيبقي اصعب يوم عليكي وعليه فلازم تكوني هاديه علي قد ما تقدري ومتفرغه

تصحي الصبح تلهيه علي قد ما تقدري طول النهار وتقدميله كل اللي بيحبه وتتفرجوا علي كارتون وتغنوا وتلعبوا
ها يسيبك مره واتنين بس ها ييجي في مره وها يزن ومش ها يعتقك ومش ها يقبل اي حاجه تديهاله
نعمل ايه هناااا
جري جري علي الدولاب ويالا نلبس عشان ها نخرج
ايا كان الوقت مش مهم
طبعا كلمه يالا ها نخرج دي سحر عند كل الاطفال وها تخليه يسكت شويه وان مسكتش البسي برضه واخرجوا
اكيد اول ما تنزلوا من البيت ويشوف الناس ها يسكت شويه
ومتنسيش تملي شنطتك باللي بيحبه
والهيه بره بقي خروج ولف ومشي لو نام يبقي تمام ارجعي البيت وسيبيه يرتاح شويه
لو منمش يبقي خليكي برا لحد ما ينام وهاتيله لعبه جديده تشغله شويه واروحي اي مطعم بيحبه اكايه
انا ابني بيحب البيتزا اوي فروحنا مطعم بيتزا
وافضلي وراه من غير رضاعه واستحملي فضايحه في الشارع
وكده كده ها ينام بره بعد المجهود ده والزن والعياط
بكده يبقي اغلب النهار عدي علي خير من غير رضاعه
نيجي بقي لليل وده اصعب جزء لان الطفل لو نسي الرضاعه بالنهار عمره ما بينساها بالليل
اعملي حسابك لازم تستحملي لان ده اصعب جزء
انا كنت بعيط كتير وكان صعبان عليا موووووووووووووت عشان كده روحت عند ماما لان عندها بيتلهي وفي ناس كتير بتشاغله وتلاعبه وبيبقي مبسوط معاهم وممكن ارتاح شويه
لو مسافره او بعيد عن اهلك يبقي ياريت الزوج ياخد اجازه علي الاقل اول يوم لان مينفعش تكوني لوحدك خالص
بالليل بقي قللي وجودك قدامه بس متختفيش خالص
يعني باباه ياخده بره وينيمه او يحاول يلهيه عنك
ولو كنتوا في البيت لاعبوه وسلوه ولو عيط اوي احضنيه وكلميه وطبطبي عليه وواسيه متحسسيهوش ان منعه من الرضاعه عقاب
العبء كله عليكي
لانك ها تشوفي عياط محصلش
وتوسل في عينيه يخليكي تعيطي
بس لازم تكوني مبتسمه قدامه
وحاولي تنيميه
وطبعا العصاير واللبن بالفواكهه موجوده لانها هي اللي بتمشي الموضوع
لو لقيتيه انهار قوي خلي حد يخرجه بعيد عنك وفي اوقت مش مشكله
المهم انه يخرج لحد ما ينام ومش مهم ياكل هو ها يبقي تعب خلاص وها ينام وبلاش تعزمي بالاكل كتير لانه ها يرفض
اول يوم لو عدي كده يبقي خلاص اليوم التاني ها يبقي اهدي والتالت كمان
بس الاهم تكوني ماشيه علي نفس الطريق
مقربه منه ومحتضناه وحطاه مع ناس واخد عليهم وبيحبهم ماما كانت بتقولي متسيبيهوش لوحده من غيرك قربك منه ها يهون عليه مش ها يتعبه لان الطفل بيحب طبطبه مامته عليه
كده الطفل خلاص بطل رضاعه واتفطم وعدت المرحله التانيه علي خي
نيجي للمرحله التالته وهي
(مرحله ما بعد الفطام)
دي اهدي مرحله
النوم هنا ممكن يتظبط وبدل ما ها يصحي كل ساعتين يرضع ها ينام فتره اطول
طبعا متتوقعيش انه ها ينسي الرضاعه بسهوله فخدي الامور عادي
واوعي تتوقعي ان الطفل طالما اتفطم ها يتفتح في الاكل
بالعكس اتوقعي فتره رفض للاكل ورفض تام كمان لان مخ الطفل ذكي جدا وها يبطل ياكل كنوع من انواع الضغط عليكي عشان ترجعيه للرضاعه
فاوعي تهتمي اعزمي عليه بالاكل وبس ولو رفض متقلقيش الدكتور قالي عمره ما هيعيش جعان ها ياكل ها ياكل
اهم حاجه السوايل والعصاير اعزمي عليه علي طول واعرضي عليه انواع مختلفه ونكهات مختلفه للتجديد

اتوقعي منه اي تصرف واتعاملي معاه بذكاء ومع الوقت ان شاء الله الطفل بيتظبط وبياكل كويس ومواعيد نومه وصحيانه بتتظبط والامور بتبقي احسن كتير
اهم حاجه بلاش عصبيه مع الطفل
ربنا يحفظ لنا اولادنا ويحميهم من كل سوء



انا كده خلصت كلامي وشكلي رغيت كتيييييييييييييييييييييير
اتمني ان موضوعي وتجربتي تفيد كل ام
ويارب كل ام تفطم طفلها بدون مشاكل

واهديها الموضوع ده

وياريت تدعولي ربنا يخليلي بنوتى ويباركلي فيها ويرزق زوجي برزقنا
ومتنسوش التقييم لو الموضوع عجبكم


اختكم في الله
الرجوع الى أعلى الصفحة اذهب الى الأسفل
https://a7alm.mam9.com
 
لكل ام الفطام التدريجي من تجربتي الشخصيه
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
مدينة الاحلام :: الأسرة والطفل بمدينة الاحلام :: عالم الطفل-
انتقل الى:  
سحابة الكلمات الدلالية
google